ஜோசியம் பார்க்கலாம் வாங்க.

குமார் என்பது அவனது பெயர்.ஒரு 15 வருஷமா ஒன்னுமே செய்யாம வீட்டிலேயே உட்கார்ந்திருக்கிறான்.வயசு 36 ஆச்சு.காலையில் எழுந்தவுடன் டிவியில் சொல்லும் ஜோதிட பலன்களை பார்த்துக்கொண்டு அன்றைய பொழுது ஆரம்பிக்கும்.சேகர் மஹாதன் ராஜா,லட்சுமி ஜயஸ்வரூபா,ஒயிட்&ஒயிட் நீல்கண்ட சிவா இப்படி பல ஜோதிட நிபுணர்களையும் அலசி ஆராய்வது தான் முக்கியமான வேலை.இவர்களில் யார் சிறந்தவர் என்று சர்டிபிகேட் வேறு கொடுப்பான்.

இப்படி ஒரு ஜோசியக் கிறுக்கனா இருப்பது காலேஜ் முடிச்சு ஒரு 4 வருஷம் கழித்து தான் தெரியவந்தது.ஆளாளுக்கு ஒரு வேலைய பார்த்து செட்டில் ஆகியிருந்தாங்க நம்ம நண்பர்கள்.எனக்கு ஏழு வருஷம் சனி பிடிச்சுருக்கு,அதனால் நான் இப்படி தான் இருப்பேன் என்று சொன்னான்.

உட்கார்ந்தே தின்னும் அளவுக்கு சொத்து இருப்பதால் சரி தான், பய வாழ்க்கையை என்ஜாய் பண்றான் போலன்னு நினச்சுக்கிட்டேன்.இவன் சோம்பேறியா இருப்பதற்கு ஜோசியத்தை நம்பினானா அல்லது ஜோசியத்தை நம்பியதால் சோம்பேறி ஆகிவிட்டானா என்று இன்று வரையில் தெரியவில்லை.ஆனால் அவனே ஒரு கட்டத்தில் ஜோசியம் பார்க்கும் அளவுக்கு அதில் பரிச்சயம் பெற்று விட்டான்.

அதனால அவனை எல்லோரும் ஜோதிடபூஷாணம் என்று சொல்லி கலாய்க்க ஆரம்பித்து விட்டனர்.அவனை சந்திக்கும் போது கையை காண்பித்து குறி கேட்பார்கள் நண்பர்கள்,அவனும் பல விசயங்களை சொல்வான்.

நான் அவனை பல கேள்விகள் கேட்டு டார்ச்சர் கொடுப்பதால் தன் திறமையை நிரூபிக்க வேண்டும் என நினைத்து ஒரு குண்டை தூக்கிப் போட்டான்.நாலு வருசத்துக்கு முன்னாடி நடந்தது இது.அதாவது கலைஞர் வரும் டிசம்பர் 15 ஆம் தேதிக்குள் காலமாவார் என்றான்.

இந்த ஜோசியம் பாக்குறவன்,சாமியை விழுந்து விழுந்து கும்புடுறவன்,சாதி இந்து என்று பெருமையா நினச்சுக்கிறவங்களுக்கு எல்லாம் கலைஞரை கண்டாலே ஆவாது.இந்த தகுதி எல்லாம் நம்மாளு கிட்டேயும் இருக்கிறதுனால அவனும் அவரை வெறுத்ததில் ஆச்சரியம் ஒன்றும் இல்லை.ஆனாலும் இப்படியா ஒரு மனிதன் சாவதற்கு நாள் குறிப்பார்கள்,என்ன மனிதனடா இவன் என்று மனம் வெறுத்துப் போய்விட்டேன்.

பின் மனதைத் தேற்றிக்கொண்டு அவனை அழைத்து ,நண்பா நீ சோதிடத்தை நிரூபிக்க வேண்டும் என்ற ஆர்வக்கோளாறில் கலைஞருக்கு நாள் குறித்து இருக்கிறாய்.கலைஞர் வயதிற்கு எந்த நேரமும் மரணமடைய வாய்ப்புகள் மிகமிக அதிகம்.அதனால் அவர் மரணமடைந்தால் அதில் உன் திறமையை நினைத்து மெச்சிக்கொள்ள ஒன்றுமே இல்லை என்று சொல்லி விட்டு,அவனை திருத்த இது ஒரு நல்லவாய்ப்பாக பயன்படுத்திக்கொள்ள வேண்டும் என நினைத்து அவ்வாறு நடக்காவிட்டால் நீ சோதிடம் பார்ப்பதையோ,நம்புவதையோ விட்டுவிட வேண்டும் என்று சொன்னேன்.அவனும் வேகமாக மண்டையை ஆட்டிவிட்டு சென்றான்.

2003 டிசம்பர்15 கெடு முடிந்துவிட்டது.நண்பன் கண்ணிலேயே சிக்காமல் தலைமறைவாகி விட்டான்.நீண்ட
இடைவெளிக்குப் பின் கையில் சிக்கியவுடன் கேட்ட முதல் கேள்வியே யப்பா ஜோதிட சிகாமணி உன் ஜோதிடம் என்ன ஆச்சு என்பது தான்.என்னிடம் ஏன் கேட்கிறாய் ,பல பெரிய ஜோதிட அறிஞர்கள்,ஆராய்ச்சியாளர்கள்,நிபுணர்கள் இவர்கள் எல்லாம் சொன்னதை வைத்துத் தான் நானும் சொன்னேன்,அதனால் அவர்களிடம் போய்க் கேள் என்றான் எகத்தாளமாக.நான் திகிலடித்துப் போய் ,சரி பயல் இன்னும் திருந்தவில்லை என்று நினைத்துக் கொண்டு உனக்குத் தான் ஏழு வருஷம் சனி எல்லாம் முடிந்து விட்டதே இன்னும் ஏன் இப்படி வெட்டியாய் இருக்கிறாய் என கேட்டதற்கு இன்னும் ஒரு 4 வருடங்கள் இப்படித் தான் இருப்பேன் என்று ஜோசியர் சொல்லிவிட்டார்.அதனால் நான் என்ன செய்தாலும் அது நிறைவேறாது ,அப்படி நான் சொல்வதில் உனக்கு நம்பிக்கை இல்லையென்றால் ஒரு 2 லட்சம் கொடு,இரண்டே மாதத்தில் அது என்ன ஆகிறதென்று நீயே பார்த்துக்கொள் என்கிறான்.

ஜோசியம்,ஜோசியம் என்று சொல்லி வீணாய்ப் போகிறானே என்று பரிதாபப் பட்டால் கடைசியில் நம்மை கேணப்பயலாக்கி விட்டானே என்று நொந்து கொண்டேன்.இதை தெரிந்தவர்களிடமெல்லாம் சொல்லி மனசை ஆற்றிக் கொண்டிருக்கிறேன்.