நல்லபாம்பு-பெயர்க் காரணம்

"உலக மிருகங்களிலேயே கொடிய விஷமுள்ள ஜந்து ஒன்றை நல்லபாம்பு என்று அழைக்கும் பெருந்தன்மை தமிழர்களுக்கு மட்டுமே உண்டு" என்று ஒரு பின்னூட்டத்திலே நான் குறிப்பிட்டிருந்தேன்.

இன்று வரை அவ்வாறு தான் நினைத்துக்கொண்டிருந்தேன்.இந்தியாவில் பசு புனிதமான மிருகமாக கருதப்படுகிறது.அதைப்போல் பாம்பும் சிவனுக்கு மிகவும் வேண்டிய ஒரு மிருகமாக இருப்பதால்
அதுவும் புனிதமாக மக்களால் கருதப்படுகிறது,அதனாலேயே இது நல்லபாம்பு என்று மக்களால் அன்புடன் அழைக்கப்படுகின்றது என்று எண்ணியிருந்தேன்.

ஜாலியின் தீவிர வாசகரான அருமை அய்யா நன்னன் அவர்கள் எனக்கு விளக்கம் சொல்லும் விதமாக நேற்று மக்கள் தொலைக்காட்சியிலே அருமையாக விளக்கினார்.தமிழிலே ஒரு வழக்கம் உண்டு,ஒரு விசயத்தை முரணாக சொல்வது.காட்டாக தண்ணீரே இல்லாத பல ஊர்களுக்கு சமுத்திரம் என்று தமிழ்நாட்டில் பெயர் உண்டு.அதைப் போன்றதா நல்லபாம்பு என்று அழைப்பதும் என்றால் இல்லை.இப்போது ஒருவன் கீழே விழுந்து அடிபட்டுவிட்டான்,உடனே நாம் நல்ல அடி என்கிறோம்,மழை விடாமல் பெய்து கொண்டிருக்கிறது ,நல்ல மழை என்கிறோம்,விளைச்சல் அமோகமாக இருக்கிறது,நல்ல விளைச்சல் என்கிறோம்.நல்ல என்ற சொல் மிகுதியான,அதிகமான என்ற பொருளிலே பயன்படுத்தப்படுகிறது.அதேபோல நல்லபாம்பு என்பதும் மிகுதியான விஷமுள்ள பாம்பு என்ற பொருளிலே பயன்படுத்தப் படுகிறது என்று அருமையான விளக்கம் கொடுத்தார்.

இன்னொரு பாம்பைப் பற்றிய ஒரு தகவலையும் சொல்லி விடுகிறேன்.ஆனைகொன்றான் தெரியுமா உங்களுக்கு?உலகின் மிகப்பெரிய பாம்பு.இதற்கு விஷம் இல்லை,ஆனால் தனது இரையை பிடித்தவுடன் அதனை நெரித்தே கொன்றுவிடும்.நம் காடுகளில் இருக்கும் மலைப்பாம்புகளின் பங்காளி தான் இவர்.மலைப்பாம்புகள் இரையை சுற்றி இறுக்கி மூச்சு திணற வைத்து கொல்லும்,ஆனைகொன்றான் இரையின் எலும்புகளை நொறுக்கி விடும்.ஆனைகொன்றான் இறுக்கும் போது 9டன்
அளவுள்ள சக்தியை வெளியிடுகிறது,ஒரு பஸ் நம் மீது ஏறி இறங்கினால் எப்படி இருக்குமோ அதே அளவு சக்தி.அமேசான் காடுகளில் இவைகள் வாழ்கின்றன.அங்கு வாழும் சில ஆதிவாசிக் குழுக்கள் இவற்றை தெய்வமாக வழிபடும் கூத்தும் நடைபெறுகிறது.

ஆனைகொன்றான் என்றால் என்னய்யா? என்று நீங்கள் கேட்பது புரிகிறது.அனகோண்டா தான் ஆனைகொன்றான்.

ஆனைகொன்றான் என்ற தமிழ் வார்த்தை தான் அனகோண்டாவாக மாறியுள்ளது.