எம்சியாரின் கருணையுள்ளம்

மூளையால் ம‌ட்டுமே சிந்திப்பவர்கள் , எம்சியாரை கோமாளி என்று தூற்றுவது வழக்கம்.இதயத்தாலும் சிந்திப்பவர்களால் தான் எம்சியாரை புரிந்து கொள்ளமுடியும்.குலேபகாவலி என்னும் திரைப்படத்தில் புலியுடன் ஒன்டிக்கு ஒன்டி சண்டை போட நேரிடும் போது ,எம்சியார் நடந்து கொண்டவிதம் அவர் மீது பெருமதிப்பை ஏற்படுத்தி விட்டது.கையிலே கத்தியுடன் இருக்கும் எம்சியார்,புலி நிராயுதபாணியாக வருவது கண்டு கத்தியை கீழே போட்டுவிட்டு வெறுங்கைகளால் கட்டிப்புரண்டு சண்டையிடுவார்.புலி இறந்து விடாதிருக்கும் பொருட்டு கவனமாக சண்டை போடுவார்.ஒரு வழியாக புலியை மூர்ச்சையாக்கி விட்டு நடந்து போவார்.விசமத்தனத்தில் நம்பியாரை விடவும் மோசமான அந்தப்புலி மயக்கம் போட்டது போல் நடித்து,எம்சியார் நடந்து செல்லும் போது பின்பக்கமாக பாய்ந்து சென்று தாக்கும்.உடனே எம்சியார் ,கீழே கிடந்த கத்தியை எடுத்து குத்தி கொன்று விடுவார்.நான் மிகவும் உணர்ச்சிவசப்பட்டு குப்புறப்படுத்து தலையணையில் முட்டி அழுதேன்.அருகில் அமர்ந்து பார்த்துக்கொண்டிருந்த என் அப்பா,என் மனநிலையைப் புரிந்தவாறு "அதான்,சீ நாயேன்னு விட்டுட்டுப் போய்ட்டாருல்ல,அப்புறம் ஏன் பின்னாடி போய்க் கடிக்கிற,நல்லா வேணும்" என்று பின்னூட்டம் போட்டார்.அதோடு இன்னும் சில தகவல்களை சொன்னார்.ஒரு படத்தில் பெண் ஒருவருடன் கத்திச்சண்டை போடும் போது , இடது கையால் கத்தியைப் பிடித்து சண்டையிடுவாராம்.இன்னொரு படத்தில் ஒற்றைக்காலில்லாத ஒருவருடன் ,இவரும் ஒரு காலைக்கட்டிக்கொண்டு சண்டையிடுவாராம்.இப்பேர்ப்பட்ட மாவீரன் இன்று நம்மிடையே இல்லையே என்ற எண்ணம் ஏக்கப்பெருமூச்சாகி தொண்டையை அடைத்தது.இவர் மட்டும் உயிரோடு இருந்திருந்தால் தமிழக காவல் துறையை இலங்கைக்கு அனுப்பி ராசபக்சேயை கொன்றிருப்பாரே என்ற எண்ணமும் தோன்றாமலில்லை.கத்தியோடு தாக்க வருபவனிடம் கண்ணியமாக நடந்து கொள்வது எப்படி என்று இன்றைய இளைஞர்களுக்குத் தெரியவில்லை.அவர்களுக்கு எம்சியார் படத்தைப் போட்டுக்காண்பிக்க வேண்டியது அரசின் கடமை.

பொறியியல் கல்லூரி இடஒதுக்கீடு

பொறியியல் கவுன்சிலிங்கில், முற்படுத்தப்பட்ட வகுப்பினரின் சேர்க்கை சதவீதம் தொடர்ந்து சரிந்து வந்துள்ளது. தமிழகத்தில் கல்வியிலும், வேலை வாய்ப்பிலும் 69 சதவீத இடஒதுக்கீட்டுக் கொள்கை பின்பற்றப்படுகிறது. பொறியியல் கவுன்சிலிங்கில், பிற்படுத்தப் பட்ட வகுப்பினருக்கு 26.50 சதவீதம், பிற்படுத்தப்பட்ட முஸ்லிம்களுக்கு 3.50 சதவீதம், மிகவும் பிற்படுத்தப்பட்டோர் மற்றும் சீர்மரபினருக்கு 20 சதவீதம், ஆதிதிராவிடருக்கு 15 சதவீதம், அருந்ததியினருக்கு 3 சதவீதம், பழங்குடியினருக்கு ஒரு சதவீதம் இடங்கள் ஒதுக்கப்படுகின்றன. மீதமுள்ள 31 சதவீத இடங்கள், அனைத்து மாணவர்களுக்கும் பொதுவாக ஒதுக்கப்படுகின்றன. இந்த ஆண்டு, பொறியியல் கவுன்சிலிங்கிற்கு ஒரு லட்சத்து 28 ஆயிரத்து 995 பேர் விண்ணப்பித்திருந்தனர். இதில் 14 ஆயிரத்து 362 பேர் (11.13%) முற்படுத்தப்பட்ட வகுப்பினர். 5,737 பேர் (4.45%) பிற்படுத்தப்பட்ட முஸ்லிம்கள். 1,615 பேர் (1.25%) அருந்ததியினர். 61 ஆயிரத்து 770 பேர் (47.89%) பிற்படுத்தப்பட்டவர்கள். 28 ஆயிரத்து 492 பேர் (22.09%) மிகவும் பிற்படுத்தப்பட்டவர்கள். 16 ஆயிரத்து 611 பேர் (12.88%) ஆதிதிராவிடர். 408 பேர் (0.32%) பழங்குடியினர். இந்த ஆண்டு கவுன்சிலிங்கில், 83 ஆயிரத்து 552 பேருக்கு இடங்கள் ஒதுக்கப்பட்டுள்ளன. இதில் 5,244 பேர் (6.28%) முற்படுத்தப்பட்ட வகுப்பினர். 3,655 பேர் (4.37%) பிற்படுத்தப்பட்ட முஸ்லிம்கள். 1,179 பேர் (1.41%) அருந்ததியினர். 41 ஆயிரத்து 449 பேர் (49.67%) பிற்படுத்தப்பட்டவர்கள். 20 ஆயிரத்து 147 பேர் (24.11%) மிகவும் பிற்படுத்தப்பட்டவர்கள். 11 ஆயிரத்து 549 பேர் (13.82%) ஆதிதிராவிடர். 279 பேர் (0.33%) பழங்குடியினர். பொறியியல் மாணவர் சேர்க்கையில், முற்படுத்தப்பட்ட வகுப்பினரின் சேர்க்கை சதவீதம் தொடர்ந்து சரிந்து வந்துள்ளது. 2005ம் ஆண்டில் 10.13 சதவீதமாக இருந்த முற்படுத்தப் பட்டோர் சேர்க்கை சதவீதம், 2006ம் ஆண்டில் 9.82 சதவீதமாகவும், 2007ம் ஆண்டில் 8.11 சதவீதமாகவும், 2008ம் ஆண்டில் 6.74 சதவீதமாகவும், 2009ம் ஆண்டில் 6.28 சதவீதமாகவும் சரிந்துள்ளது. அதேபோல, 2005ம் ஆண்டு 21.83 சதவீதமாக இருந்த மிகவும் பிற்படுத்தப்பட்டோர் சேர்க்கை சதவீதம், 2006ம் ஆண்டு 20.98 சதவீதமாக குறைந்துள்ளது. ஆனால், அடுத்த ஆண்டுகளில் இப்பிரிவில் மாணவர் சேர்க்கை அதிகரித்துள்ளது. 2007ம் ஆண்டில் 22.70 சதவீதம் பேர், 2008ம் ஆண்டில் 23.78 சதவீதம் பேர், 2009ம் ஆண்டில் 24.11 சதவீதம் பேர் மிகவும் பிற்படுத்தப்பட்டோர் பிரிவில் பொறியியல் படிப்பில் சேர்ந்துள்ளனர்.பிற்படுத்தப்பட்ட கிறிஸ்தவர்கள், முஸ்லிம்கள் உட்பட பிற்படுத்தப்பட்டோர் பிரிவில், 53 - 54 சதவீத அளவில் மாணவர்கள் சேர்ந்துள்ளனர். ஆதிதிராவிடர் பிரிவில், கடந்த ஆண்டுகளில் 14 - 15 சதவீதம் பேர் சேர்ந்துள்ளனர். பழங்குடியினர் பிரிவில், 0.5 சதவீதத்திற்கும் குறைவான மாணவர்களே சேர்ந்துள்ளனர். இப்பிரிவுகளில் மாணவர் சேர்க்கையில் பெரிய அளவில் மாற்றங்கள் நிகழவில்லை. நன்றி‍‍‍‍ தினமலர்

மருத்துவக்கல்லூரி இடஒதுக்கீடு

இந்த ஆண்டு மருத்துவக்கல்லூரி மாணவர் சேர்க்கைக்கான தரவரிசைப்பட்டியலைப் பார்த்த போது ஆச்சரியமூட்டும் பல தகவல்கள் புலப்பட்டன.தமிழகத்தின் மக்கள் தொகை சாதிவாரியாக பிற்பட்டோர் 46%, மிகவும் பிற்பட்டோர்18%,தாழ்த்தப்பட்டோர்20%,முற்பட்டோர்13%,மற்றவை3%
என்று ஒரு தகவல் கூறுகிறது. மருத்துவக்கல்லூரி மொத்த இடங்கள் தோராயமாக 1500.இந்த இடங்களை தரவரிசைப்படியே நிரப்பினால் ,பிற்பட்டோர் பிரிவு வியக்கவைக்கும் அளவிற்கு அதிக இடங்களைப் பெற்றுள்ளது.சுமார் 1020 இடங்கள்.பிற்பட்டோரின் 46 சதவிகிதப்படி அவர்கள் பங்கு 690 இடங்கள் என்றால்,அபரிமிதமான வளர்ச்சியாக கூடுதலாக 330 இடங்கள் பெற்றுள்ளனர். முற்பட்ட வகுப்பினர் 30,40 ஆண்டுகளுக்கு முன்பு இத்தகைய நிலையில் தான் இருந்திருக்கவேண்டும்.அந்த நிலையை பிற்பட்டோர் அடைந்துள்ளனர்.இடஒதுக்கீட்டின் நோக்கத்தை எப்போதோ அடைந்து அதைத்தாண்டியும் சென்றுவிட்டனர்.
அடுத்து மிகவும் பிற்பட்டோர் 18சதவிகிதப்படி அவர்கள் பெற வேண்டிய இடங்கள் 270.இட ஒதுக்கீடு இல்லாமல் தரவரிசைப்படியே அவர்கள் பெற்றுள்ள இடங்கள் 272. இட ஒதுக்கீட்டின் நோக்கம் இப்போது தான் நிறைவேறியுள்ளது.

அடுத்து தாழ்த்தப்பட்டோர் 20 சதவிகிதப்படி 300 இடங்கள் பெறவேண்டும், பெற்றிருப்பதோ 73 இடங்கள் மட்டும். இட ஒதுக்கீட்டின் நோக்கம் நிறைவடையவில்லை.

அடுத்து முற்பட்டோர் 13சதவிகிதப்படி 195 இடங்கள் பெற்றிருக்க வேண்டும்,ஆனால் பெற்றிருப்பதோ 136 இடங்கள் மட்டுமே.1500 இடங்களையும் திறந்த முறையில் தேர்வு செய்தாலும் அவர்கள் பங்கிற்கு குறைவாகவே பெற்றுள்ளனர்.இட ஒதுக்கீட்டின் நோக்கம் நேரடியாக பாதிக்கிறது.

சாலிசம்பர் கமிசன் பரிந்துரைகள்:
பிற்பட்டோருக்கான இடஒதுக்கீட்டில் மாற்றம் தேவை,இது இப்படியே தொடருமானால் இன்னும் சில,பல ஆண்டுகளில் முற்பட்ட வகுப்பினர் மிகமிகக் குறைந்த இடங்களையே பெறும் சூழ்நிலை உருவாகலாம்.பிற்பட்டோர் இடஒதுக்கீட்டை அப்படியே ரத்து செய்தாலும் பாதிப்பு ஒன்றும் ஏற்படாது,திறந்த முறையிலேயே அவர்கள் பங்கான 690 இடங்களைப் பெற்றுவிடலாம்.ஆனால் ரத்து செய்வது சாத்தியமில்லை என்பதால் 30 சதவிகித ஒதுக்கீடு என்பதை 23சவிகிதமாகக் குறைக்கலாம்.

மிகவும் பிற்பட்டோருக்கும் இடஒதுக்கீட்டை ரத்து செய்வதால் பாதிப்பு ஒன்றுமில்லை.ஆனாலும் இடஒதுக்கீட்டின் நோக்கம் இப்போது தான் நிறைவேறியுள்ளதால் ,இப்பிரிவினருக்கு சலுகை காலமாக சில,பல ஆண்டுகளுக்கு நீடிக்கலாம்.

தாழ்த்தப்பட்டோர் பிரிவினர் மிகமிகக் குறைந்த இடங்களையே பொதுப்பிரிவில் பெற்றிருப்பதால் அவர்களுக்கான இடஒடுக்கீட்டின் அளவையும் கூட்டி இன்னும் 30 ஆண்டுகளுக்கு நீட்டிக்க வேண்டும்,அல்லது திறந்த முறையில் அவர்கள் பங்கான சுமார் 300 இடங்களைப் பெறும் வரையிலும் நீட்டிக்க வேண்டும்.

முற்பட்ட வகுப்பினர் தங்கள் பங்கை விட குறைவாகவே பெற்றுள்ளதால் இடஒதுக்கீடு பெற இவர்களும் தகுதியானவர்கள் ஆகிறார்கள்.7 சதவிகித இடஒதுக்கீடு கேட்பது நியாயமானதே.அனைத்து முற்பட்டோருக்கும் சேர்த்து 7% ஒதுக்கீடு செய்யலாம்.
அதே நேரத்தில் இதே வகையான ஒதுக்கீடு உயர்கல்வி நிறுவனங்களிலும்,மத்திய அரசு துறைகளிலும் வருவதற்கு முற்பட்ட வகுப்பினர் ஆதவளிக்க வேண்டும்,சமத்துவ இந்தியா விரைந்து மலரட்டும்.
தொடர்புடைய சுட்டிகள்:
http://www.rediff.com/news/2006/may/30spec.htm
http://www.tn.gov.in/misc/dme/UG-2009-2010/meritlist2009-2010_010709.pdf
http://www.southasianmedia.net/Magazine/Journal/13_obc-reservation.htm

அண்ணாவின் கடிதமும்,அறிவுசீவியின் அழிச்சாட்டியமும்

அண்ணா மரணப்படுக்கையில் இருந்த போது தன் குடும்பத்தினருக்கு எழுதியது இந்தக்கடிதம்.குடும்பத்தாருக்கு தனிப்பட்ட முறையில் எழுதிய போது கூட கட்சியையும்,அதற்காக உழைப்பவர்களையும் மறக்கமுடியவில்லை அண்ணாவால்.கட்சிக்காரர்களில் முதலாவதாக கலைஞரையும்,அடுத்து ஆதித்தனார்,நாவலர் ஆகியோரையும் கேட்டு எழுதியுள்ளார்.

இந்தத் தகவலை இங்கே குறிப்பிட காரணம்,அறிவுசீவி ஒருவரின் அழிச்சாட்டியம். பேரறிஞர் அண்ணா நூற்றாண்டு நினைவுச் சிறப்புக் கட்டுரை ஒன்று காலச்சுவடு இதழில் வெளிவந்தது.அந்தக்கட்டுரையில் ஓரிடத்தில் கூட கலைஞர் பெயர் குறிப்பிடப்படவில்லை.அண்ணாவின் வாழ்க்கையிலும்,திமுகவின் வரலாற்றிலும் கலைஞர் பெயர் குறிப்பிடாமல் கட்டுரை வரையும் போட்டி காலச்சுவடு நடத்தியதா என்று தெரியவில்லை.கட்டுரையாளருக்கு ஏன் கலைஞர் மீது இப்படி ஒரு காழ்ப்பு?.

சோற்றுக்கு சிங்கியடித்து,பிள்ளைகுட்டிகளை தவிக்கவிட்டுவிட்டு,கடைசியில் அனாதையாக சாவதே நல்ல தலைவனின் இலக்கணமாக ஒரு கருத்தாக்கம் நம்மை அறியாமலே நாம் உருவாக்கிக்கொள்கிறோம் என்று நினைக்கிறேன்.இத்தகைய தியாகங்கள் செய்யாததால் கலைஞர் ஒரு சாராரால் வெறுக்கப்படுகிறார் என்றும் எண்ண வேண்டியுள்ளது.

கடவுளே , திராவிடர்களிடமிருந்து கலைஞரைக் காப்பாற்று,ஆரியர்களை அவரே பார்த்துக்கொள்வார் என்று கடவுளிடம் வேண்டிக்கொள்ளும் இக்கட்டான நிலைக்கும் நம்மை கொண்டுவந்துவிட்டார்கள் இந்தக்காழ்ப்பாளர்கள்.
படத்திற்கு நன்றி: சண்டே இந்தியன் இதழ்

விசயகாந்த் வேதனை அறிக்கை.

//இந்தியாவின் மக்கள்தொகை 110 கோடி.தமிழ்நாட்டு மக்கள் தொகை 8 கோடி. மொத்த மக்கள்தொகையில் தமிழர்கள் 8 சதவீதம்.மத்தியில் அமையப்போகும் அரசின் அமைச்சர்கள் எண்ணிக்கை 80. தமிழ்நாட்டின் பங்கு 8 சதவீதப்படி 6.5 தமிழகத்திற்கு கிடைக்கவேண்டும்.தமிழக காங்கிரசுக்கு 2 இடங்கள் ஒதுக்கியது போக 4.5 இடங்கள் தான் திமுகவிற்கு கொடுக்கப்படவேண்டும். ஆனால் திமுக தலைவரோ 7 இடங்களுக்கும் அதிகமாக கேட்டுக்கொண்டிருக்கிறார்.இதன் மூலம் தமிழகத்திற்கு துரோகம் செய்கிறார், இந்தியாவின் இறையாண்மைக்கும் சவால் விடுகிறார்.இந்தப்போக்கை காங்கிரசுக்கட்சி அனுமதிக்கக்கூடாது.//

இவ்வாறு விசயகாந்த் அறிக்கையில் குறிப்பிட்டுள்ளார்.இந்தக்கருத்தை சோ வரவேற்றிருக்கிறார்.

இந்தியா பிழைத்தது

செல்லும் வழியெங்கும் நச்சுக்கிருமிகளை விதைத்துச்செல்லும் நடமாடும் பிணம் அத்வானி ,பிரதமர் ஆகும் அபாயத்திலிருந்து நாடு தப்பித்துள்ளது.ஏற்கெனவே அத்வானியால் செலுத்தப்பட்ட நச்சுக்கிருமிகளால் ,இந்திய மக்களுக்கு நோய் எதிர்ப்பு சக்தி ஏற்பட்டிருந்தது,அதனால் இந்தமுறை கிருமிகளால் பெரிய பாதிப்பு ஏற்படுத்த முடியாமல் போய்விட்டது.செயலலிதாவை பா.ச.க உடன் சேர விடாமல் ஏதோ ஒரு வகையில் தடுத்துதவிய கம்முனிச்சுடு தலைவர்களை நன்றியோடு நினைத்துப் பார்க்க வேண்டும்.123 ஒப்பந்தம் என்று யாருக்குமே புரியாத ஒரு விசயத்தைப் பிடித்து தொங்கிக்கொண்டிருந்த கம்முனிகளுக்கு மரண அடி.

//கலைங்ஞேன் என்ன குறை வச்சான் இவய்ங்களுக்கு,ரெண்டு,மூனு சீட்டுக்கு அந்தம்மா முன்னாடி போயி கையக்கட்டிக்கிட்டு , நிக்கிறாய்ங்க,வெக்கங்கெட்டவய்ங்க. 123 ஒப்பந்தம்,அணுஆயுதம் ஒப்பந்தம்,அதுக்காகத்தான் விலகுனோம் அப்படின்னு மேடை போட்டு பேசுனா எவனுக்காச்சும் வெளங்குமா, தோப்போம்னு தெரிஞ்சே மதுரையே கேட்டு வாங்கியாந்திருக்காய்ங்க, வெட்டிப்பயலுக,அதனால தான் தேர்தல் வேலைக்கே போகல// பத்து நாட்களுக்கு முன் மதுரை வேட்பாளர் மோகன் பிரச்சாரக்கூட்டத்தை கடந்து செல்கையில் ஆட்டோக்கார மார்க்சியர் புலம்பியது தான் இது.

ரத்னேஷ் அவர்களின் பதிவில் குறிப்பிட்டுள்ள படி திமுக,காங்கிரசு கூட்டணி சென்ற தேர்தலில் பெற்றிருந்த பலத்தை விட இம்முறை அதிகமாகவே பெற்றுள்ளது.ஒட்டுண்ணியான பாமக இல்லாததால் திமுகவிற்கு இன்னும் அதிக செல்வாக்கு மத்திய அரசிலே ஏற்படும். சுதந்திர இந்தியாவில் ,தமிழகத்தின் பொற்காலம் கடந்த ஐந்தாண்டுகள் தான் என்பது மறுக்கமுடியாத உண்மை.இனியும் அப்படி ஒருகாலம் வருமா என்று மனக்கிலேசம் அடைந்திருந்தேன்,ஆனால் அதையும் விட அருமையான பொற்காலம் இனிமேல் தான் இருக்கிறது.இதையெல்லாம் சாதித்துக்காட்டிய கலைஞருக்கு தமிழினம் என்றென்றும் நன்றிக்கடன் பட்டிருக்கிறது.கேவலமான அவதூறுகள்,பழிச்சொற்கள்,அபாண்டமான குற்றச்சாட்டுகள் அனைத்தையும் பொறுமையாக எதிர்கொண்டு ‘பாம்பு கடித்தால் திருப்பியா கடிக்கமுடியும்’ என்று கடந்து போன கலைஞரை புரிந்துகொண்டு அவருக்கான மரியாதையை அளித்துள்ளனர் மக்கள்.
தமிழினத்தலைவர் என்று மதிக்கப்படும் கலைஞர் மேல் காழ்ப்புகொண்டு நெடுமாறன்,ராமதாசு போன்றவர்கள் செய்த கேடுகெட்ட மொள்ளமாரித்தனங்கள் , இன்று அவர்களையே மூட்டைப்பூச்சியைப் போல் நசுக்குவது நசுக்கியுள்ளன.இப்போது வைகோ வரிசையில் இவர்களும் சேர்ந்திருக்கிறார்கள்.சென்ற சட்டமன்றத் தேர்தலில் விசயகாந்தின் வரவு வைகோவுக்கு சாவுமணி அடித்தது,இந்தத்தேர்தலில் மருத்துவர் அய்யாவுக்கும் அடித்துள்ளது.
தமிழகத்தில் நடக்கும் நலத்திட்டங்கள்,வளர்ச்சிப்பணிகள் போன்றவற்றையெல்லாம் கணக்கில் கொள்ளாமல் ஈழப்பிரச்சினையை வைத்து கலைஞரைக் கேவலப்படுத்திய
அறிவுசீவிகள்,உணர்வாளர்கள்,இணைய புரட்சியாளர்கள்,அனைவரும் ஒன்றைப்புரிந்து கொள்ள வேண்டும்.
“தலை இருக்கும் போது வால் ஆடக்கூடாது” .

ஏன் நான் கலைஞர் ஆதரவாளனாக இருக்கிறேன்?

மு.கு:சென்ற மாதம் 25ஆம் தேதியில் இந்தப்பதிவை எழுதி. அப்போது இருந்த கலைஞர் எதிர்ப்பு சூழ்நிலையால் வெளியிடாமல் வைத்திருந்தேன்.அப்போது இருந்த தயக்கம் இப்போது இல்லை.

“மத்திய அரசே, தமிழகத்திற்கு கேபினட் அந்தஸ்து மந்திரி கொடு” என்று தமிழக நகரங்களின் சுவர்களில் கதறும் வாசகங்களை இருபது ஆண்டுகளுக்கு முன் பார்த்திருப்போம்.மத்திய அரசின் அதிகாரங்களைப் பகிர்ந்து கொள்வதே கனவாக இருந்த ஒரு காலத்தில் அக்கனவை நனவாக்க திராவிட இயக்கத்தலைவர்கள் செய்த தியாகமும்,ஆற்றிய உழைப்பும் அளவிடற்கரியது. இனவுணர்வையும்,மொழியுணர்வையும் மக்களுக்கு ஊட்டி வளர்த்து, ஒன்று திரட்டி தமிழகத்திற்கு தேவையானதை சாதித்துக்கொள்ளும் ஆற்றல் , கலைஞரை விட்டால் வேறு யாருக்கு இருந்திருக்கும்.

இலங்கையில் நடக்கும் தமிழினப்படுகொலையை சாக்காக வைத்து கலைஞர் மீது காழ்ப்பை வெளிப்படுத்தும் போக்கு தமிழின ஆ ர்வலர்களிடையே தீவிரமாக வளர்ந்து வருகிறது.சிங்கள அரசுடன் போரிட்டு வெல்லும் வாய்ப்பு ஈழத்தமிழர்களுக்கு எந்த அளவிற்கு இருக்கிறதோ அதில் பத்தில் ஒரு பங்கு வாய்ப்பு கூட இந்திய அரசை எதிர்த்து நின்றால் இந்தியத்தமிழர்களுக்கு இருக்காது.இந்த உண்மையை உணர்ந்து அண்ணா தனிநாடு கோரிக்கையை கைவிட்டார்.பின்னால் தமிழகத்தின் அதிகாரத்தைப் பிடித்ததும், இப்போது இந்திய அரசிலே மதிப்புமிக்க இடத்தைப் பெற்றிருப்பதும் செயலலிதாவின் நாடகத்தனமான சாதனை போன்றது அல்ல.பெற்றிருக்கும் அதிகாரத்தை வைத்து தமிழ்நாட்டுக்கான வளர்ச்சித்திட்டங்களைப் பெறுவதில் மற்ற மாநிலங்கள் பொறாமைப்படும் அளவுக்கு கலைஞரின் செயல்கள் இருக்கின்றன. இதற்குத்தான் கலைஞரை நம்புகிறோம்.இதை விட்டுவிட்டு ஈழப்பிரச்சினையில் தானே வலியச்சென்று பலியாடு ஆக வேண்டுமென்று எதிர்பார்ப்பது என்ன நியாயம்?

திருமா,சீமான் போன்ற இளந்தலைவர்கள் இந்திய சட்டங்களுக்கு கட்டுப்படமாட்டோம் என்று காட்டினாலும் உட்பட்டுத்தான் ஆகவேண்டும்.அது தலைவிதி.அப்படி உட்பட்டு என்ன செய்யமுடியுமோ அதைவிட அதிகமாகவே செயலாற்றுகிறார் கலைஞர்.

கலைஞர் குடும்பத்தினர் அரசியலில் நுழைவது பலரின் கண்களை உறுத்துகிறது.வாரன் பபெட் போன்ற வள்ளல்களுக்கே அதைக் கேள்விகேட்கும் அருகதை உள்ளது.மட்டுமின்றி செயா போன்ற நாலாந்தர நாரீமணிகளிடம் அரசியல் செய்ய அண்ணன் அழகிரி பாணியும் தேவைப்படுவது காலத்தின் கட்டாயம்.

கலைஞரின் போராட்டகுணமும்,ஆதிக்கத்திற்கு அடிபணியாத தன்மையும் சந்தேகத்திற்கு அப்பாற்பட்டது.இந்திராவின் அவசர நிலைப்பிரகடனத்தை எதிர்த்து நின்ற ஒரே மாநிலம் தமிழ்நாடு,அதனால் ஒருமுறை ஆட்சி கலைக்கப்பட்டது.அடுத்து ஈழத்தமிழருக்கு காட்டிய ஆதரவால் இன்னொரு முறை அவரது ஆட்சி காவு வாங்கப்பட்டது.ஆனால் மண்டல் கமிசன் பிரச்சினையால் கலைக்கப்பட்டதாக புதுக்கதை புனையப்படுகிறது.செயா,சு.சாமி,வெங்கட்ராமன் போன்ற தமிழ் எதிரிகளால் சட்டம்,ஒழுங்கு பிரச்சினை காரணம் காட்டி ஆட்சி கலைக்கப்பட்டது.செயாவைக் கண்டிக்க வக்கில்லாமல் கலைஞரின் மீது பாய்ந்து பிறாண்டுவதின் உளவியலை புரிந்துகொள்ள இயலவில்லை.

புத்தாண்டின் புத்தம்புது முடிவு

தருமி அய்யா சாலியாக ஒரு பதிவு இட்டுள்ளார் , அதன் தொடர்ச்சியாக இந்தப்பதிவு.2008ன் இறுதி நாளில் நடந்த வலைப்பதிவர் மாநாட்டில் நான்,தருமி அய்யா,சீனா அய்யா, டிபிசிடி, மற்றும் சோலைஅழகுபுரம் பாலா ஆகியோர் கலந்து கொண்டோம். பிரபு ராஜதுரை அவர்களை ஆட்கொணர்வு மனு போட்டு தான் அடுத்தமுறை வரவைக்க வேண்டும்.மண்டல் கமிசன் பற்றி பேச்சு வந்த போது சந்திரமுகி சோதிகா மாதிரி திடீரென்று மாறிவிட்டேன்.இயக்குனர் சங்கரின் சென்டில்மேன் படத்தை பார்த்துக்கொண்டிருக்கும் போது பாதியிலேயே எழுந்து வந்ததையும்,அதன் பி்றகு அவருடைய படங்களை திரையரங்குகளில் பார்ப்பதை புறக்கணிப்பதையும் ஆவேசமாக கூறினேன்.(இந்தியன் மட்டும் கமலுக்காக பார்த்தேன்). மண்டல் கமிசனால் பலனேதும் இல்லாத சீனா அய்யா என்ன நினைப்பாரோ என்று சங்கடமாக இருந்தது. அப்பொழுதே உங்களுக்கு அவ்வளவு அறிவு இருந்ததா என்று ஆச்சரியத்தை வெளிப்படுத்திய டிபிசிடி , அப்போது தான் பத்தாம்வகுப்பு படித்துக்கொண்டிருந்ததை நினைவு கூர்ந்தார்.

பங்காருஅடிகளாரின் மகன் மதுரைக்கு வந்த போது தங்கள் வீட்டில் தங்கிய சம்பவத்தை சிறிது விளக்கினார் டிபிசிடி.அவருக்காக மற்றவர்கள் சைவச்சாப்பாடு உண்டதையும், அவர் குழுவினர் தனியறையில் அசைவ உணவை ஒரு கட்டு கட்டியதையும் கட்டுடைத்தார்.தன் காலில் விழுந்து ஆசி வாங்கியவர்களை அவர் சக்தி என்று அழைத்ததையும், காலில் விழாத தன்னை பிரதர் என்று அழைத்ததையும் சொல்லி கிச்சுகிச்சு மூட்டினார்.

லக்கி,கைப்புள்ள,சொள்ளுப்பாண்டி போன்றவர்களின் ஒட்டுமொத்தக்கலவையாக வருவார் என்று கட்டியங்கூறும் எழுத்துக்குச் சொந்தக்காரர் சோலைஅழகுபுரம் பாலா.பொறியாளராக பிஎசுஎன்எல்லில் பணியாற்றுகிறார்.

மாநாடு முடியும் நேரத்தில் பேச்சு சூடு பிடித்தது.தமிழ்க்கொலை புரிவதில் தவறேதுமில்லை என்னும் திடநம்பிக்கையுடன் எழுதும் போக்கைப்பற்றிய பேச்சு வந்தது.அதிர்ட்டப்பதிவரின் சமட்கிருதப்பாணி பெயரைப்பற்றியும் பேசப்பட்டது.கிரந்த எழுத்துக்களை பயன்படு்த்துவதைத் தவிர்க்க வேண்டும் என்ற டிபிசிடியின் வாதத்தை மறுத்தார் தருமி அய்யா. ஜார்ஜ் என்ற தன்னுடைய பெயரை சார்சு என்றா கூற வேண்டும் என்று சொல்லி வெறுத்துப்போனார். ஏற்கெனவே வலைப்பதிவில் இந்த பெயர் விசயத்தில் ஜெயபாரதன் அய்யாவிற்கும்,நயனம் அய்யாவிற்கும் இடையே நடந்த பிரசித்தி பெற்ற சண்டை ஒன்று உள்ளது நினைவுக்கு வந்தது.பிறமொழிச்சொற்களை ஏற்றுக்கொண்டால் தானே தமிழ் வளரும் என்பது தருமி அய்யாவின் வாதம். பிறமொழிச்சொற்களை ஏற்றுக்கொள்வது வேறு பிறமொழி எழுத்துக்களை பயன்படுத்துவது வேறு என்று நான் சொன்னேன். இந்த இடத்தில் நன்னன் அய்யாவை துணைக்கு அழைத்துக்கொண்டேன்.அவரிடம் ஒருவர், 'தமிழ் என்பதை ஆங்கிலத்தில் tamil என எழுதுகிறார்களே இது சரியா?' என்று கேட்டார். அதற்கு நன்னன் அய்யா மிகவும் சரியானது தான்., அந்த மொழியில் பொருத்தமான ஒலியமைப்பு உள்ள எழுத்துக்களைப் பயன்படுத்துவதில் தவறேதுமில்லை.அதைப்போலவே தமிழிலும் பிறமொழிச்சொற்களை பயன்படுத்தும் போது தமிழில் உள்ள எழுத்துக்களை மட்டுமே பயன்படுத்துவது தான் சிறப்பு என்றும் கூறினார்.கிட்டத்தட்ட பேச்சு நிறைவடைந்து கிளம்பி விட்டோம்.

தருமி அய்யாவுக்கு இருக்கும் அதே பிரச்சினை எனக்கும் இருக்கிறது.என் மகள் ஜென்னியின் பெயரை தமிழில் எப்படி எழுதுவது என்று நீண்ட நாளாக குழம்பிக்கொண்டிருந்தேன்.மொழி என்பது ஒரு கருவி தானே ஒழிய உணர்வு ரீதியாக பொருட்படுத்தத்தேவையில்லை என்பது பகுத்தறிவாளர் பார்வை, தருமி அய்யாவின் பார்வை இத்தகையது என்று தான் நான் நினைக்கிறேன்.எனக்கும் இவ்வாறான எண்ணமே இருந்தது.ஆனாலும் ஆழ்ந்து யோசிக்கும் போது மொழியின் இசைவுக்கு மாறான எழுத்துக்களை பயன்படுத்துவது, மொழியைக் கறைப்படுத்துவதாகவே எனக்குத்தெரிகிறது.ஜீசஸை யேசு என்பதும், க்ரைஸ்ட்டை கிறிஸ்து என்பதும்,ஷங்கராச்சார்யாவை சங்கரச்சாரியார் என்பதும் தான் நம் மொழியின் இசை.ஜென்னியை தமிழில் எழுதும் போது சென்னி என எழுத இனி தயக்கமேதும் இல்லை.இப்படி ஒரு முடிவை துணிந்து(!) எடுக்கத்தூண்டுதலாயிருந்த டிபிசிடிக்கு நன்றி.

சார் என்பதை ஸார் என்று எழுதும் உண்மைத்தமிழன் போன்றவர்கள் இந்தப்பதிவைப்படித்தால் கைகொட்டிச்சிரிப்பது உறுதி.

பி.கு:
மெய்யாலுமே கடைசி வரியை எழுதியவுடன் தருமி அய்யாவின் பதிவு முகவரியை தெரிந்துகொள்ள அங்கு சென்றால் , பின்னூட்டத்தில் உ.தமிழன் அங்கலாய்த்திருக்கிறார்.கொடுமையோ கொடுமை.

இலங்கைக்கு ஒரு பண்டாரநாயகே,இந்தியாவுக்கு ஒரு அத்வானி.

இலங்கையின் முன்னாள் அதிபர் சந்திரிகாவின் தந்தை சாலமன் பண்டாரநாயகே தான் இன்று இலங்கை பற்றி எரியக்கொள்ளி வைத்தவர்.ஆட்சியைப்பிடிக்கும் அதிகாரவெறியில் 'சிங்களா ஒன்லி' என்ற முழக்கத்தோடு சிங்கள மக்களின் உணர்வுகளைப் பயன்படுத்தினார்.ஆட்சியையும் பிடித்தார்,சிங்களம் தான் ஆட்சி மொழி என்பதை நடைமுறைப்படுத்த ஆரம்பித்த உடனேயே தமிழர்களின் எதிர்ப்பும் ஆரம்பித்தது.தங்களுடைய உரிமைகளும்,சுயமரியாதையும் பறிபோக ஆரம்பித்தவுடன் ஜனநாயக ரீதியில் போராட ஆரம்பித்தனர் தமிழர்கள். இராணுவ பலத்தின் மூலம் அவர்களை ஒடுக்க முனைந்த ஆரம்பித்த அதேகணத்தில் கொழும்பில் குண்டுவெடிக்க ஆரம்பித்தது.இன்றுவரை தொடர்கிறது. உலகின் உல்லாசபுரியாக இருந்திருக்க வேண்டிய நாடு , இன்று உயிரைக்கையில் பிடித்துக்கொண்டு ஒவ்வொரு நாளையும் ஓட்ட வேண்டிய நிலையில் இருக்கிறது.

இந்தியாவிலும் ஒரு பண்டாரநாயகா இருக்கிறார்.அவர் பெயர் அத்வானி.இந்த நடமாடும் பிணத்தின் நாசகார சிந்தனைகளால் இந்தியா இன்று தாங்கொணா இன்னல்களை அனுபவித்து வருகிறது.சாதியால் பிற்படுத்தப்பட்ட,தாழ்த்தப்பட்ட மக்கள் வாழவகை செய்யும் மண்டல் கமிசனை அமுல்படுத்த வி.பி.சிங் அரசு முயன்ற போது அத்வானியின் உள்ளிருக்கும் சாத்தான் விழித்தது. பிராமணர்களுக்கு சமமாக மற்றவர்களும் வருவதா? அது இந்து மத தர்மத்திற்கு விரோமானதாயிற்றே? என்றெல்லாம் சிந்தித்து அந்த மண்டல் கமிசனை இல்லாது ஒழிக்க திட்டம் தீட்டினார்.அந்த திட்டத்திற்கு கிடைத்த பலியாடு, முஸ்லிம் மக்கள். பத்துபைசா பிரயோஜனம் இல்லாத பாபர் மசூதியை உடைத்த பொழுது இந்தியா என்னும் நாட்டை தான் நாம் உடைக்கப்போகிறோம் என்பதை அவர் உணரவில்லை.

பேரினவாதம்,மதவாதம் பேசும் போது அதனால் பாதிக்கப்படுபவன் விரலைச்சூப்பிக்கொண்டா உட்கார்ந்திருப்பான்.காயம்பட்ட அவனது மனது எந்த ஒருகொடூர செயலையும் செய்ய துணிந்து விடுகிறது.எந்த ஒரு குற்றத்திற்கும் மோட்டிவ் (motive) ஒன்று உண்டு.இந்தியாவின் குண்டுவெடிப்புகளுக்கு மோட்டிவ், அத்வானி அன்கோ தான் என்று கண்ணை மூடிக்கொண்டு கை காட்டலாம்.

அத்வானி மட்டுமல்ல அவர்தம் கொள்கைகளும் நடமாடும் பிணம் தான்.அந்தப்பிணங்களுக்கு மக்கள் என்றைக்கு சமாதி கட்டுகிறார்களோ அன்றைக்கு தான் இந்தியாவுக்கு விடிவுகாலம்.

பி.கு:
இன உணர்வு,மொழியுணர்வை தூண்டி தான் திமுக முன்னோடிகள் அதிகாரத்தைக் கைப்பற்றினார்கள் என்பதையும் எண்ணிப்பார்க்கவேண்டும்.ஆனால் எக்காலத்திலும் அவர்கள் பார்ப்பனர்கள் மேல் வன்முறையை ஏவிவிடவில்லை.அதற்குக்காரணம் இயல்பிலேயே அமைந்த தமிழனின் பரந்த மனப்பான்மையும், திராவிட இயக்கத்தலைவர்களின் எண்ணங்களை ஆளுமை செய்த காந்தியடிகளும் தான்.

சீனு அவர்களுக்கு பகிரங்க தந்தி

//சீனு said...
ம்ம்...அந்த நானூறு கோடிய உங்க கிட்ட கொடுத்திருந்தா என்ன புடுங்கியிருப்பீங்க? 350 கோடிய சுருட்டிட்டு 5 கோடியில பேருக்கு நலத்திட்ட உதவிங்கிற பேருல அதுலயும் கொள்ளை அடிச்சிருப்பீங்க.//

இந்தியா என்னும் மாட்டுக்கொட்டடியில் இருந்து எதையும் பிடுங்க முடியாது.தமிழ்நாடு தனிநாடாக இருந்தால் ஐரோப்பாவில் உள்ள எந்த ஒரு நாட்டுக்கும் மதிப்புக்குறையாத வண்ணம் இருக்கும் என்று நான் நிச்சயமாக நம்புகிறேன்.இப்போதும் இந்தியாவில் முன்னணி மாநிலங்களில் ஒன்றாக தமிழ்நாடு விளங்குகிறது.முற்போக்கு எண்ணங்கொண்ட திராவிட இயக்கத்தலைவர்களே அதற்குக் காரணம்.

//காயடித்தால் மட்டும் போதாது. வீதியில் கட்டி வைத்து சாகும் வரை சவுக்கால் அடிக்க வேண்டும்.//

அனானி, மனிதநேயம் என்பதற்கு முன்னால் தேசியம்,தேசபக்தி என்பது எல்லாம் அவற்றின் மீது ஒன்னுக்கடிக்க கூட தகுதியில்லாதவை . உங்களைப் போன்ற ஆசாமிகளை கழுவில் ஏற்றினால் தான் நாடு விளங்கும்.

முற்போக்காளரையும் விஞ்சிய அதிமுற்போக்காளர்களுக்கு இந்தச்சுட்டி .
http://www.uyirmmai.com/ContentDetails.aspx?cid=532

கறுப்பரசன் ஒபாமா

அமெரிக்கா என்றாலே பிரம்மாண்டம் தான்.நாட்டின் பரப்பிலும்,அறிவின் ஆழத்திலும் பிரம்மாண்டம் தான், இப்போது எங்களுடைய மனசும் பிரம்மாண்டம் தான் என்று உலகத்திற்கு நிரூபித்து இருக்கிறார்கள்.கறுப்பு,வெள்ளை பெற்றோருக்கு பிறந்த கலப்பின ஒபாமாவை அமெரிக்க அதிபர் ஆக்கியிருப்பதன் மூலம் புதியதோர் செய்தியை உலகிற்கு தெரிவித்துள்ளனர். இனமோ,நிறமோ ஒரு பொருட்டல்ல என்பதே அந்தச்செய்தி.இந்த நிகழ்வானது உலக சமுதாயத்திலே கறுப்பின மக்களுக்கு தன்னம்பிக்கையையும்,வெள்ளையின மக்களுக்கு புதிய பார்வையையும் அளிக்கும்.

இந்தியா , அமெரிக்காவை விட மாபெரும் ஜனநாயக நாடு,அதிலும் மதச்சார்பற்ற நாடு என்பதில் நமக்கெல்லாம் பெருமை தான்.மதச்சார்பற்ற நாடு என்பது அதிகாரபூர்வமாக இருக்கிறதே தவிர நடைமுறையில் இல்லை. நம் நாட்டின் உச்சபட்ச அதிகாரம் வாய்ந்த பிரதமர் பதவிக்கு ஒரு முஸ்லிமையோ, அல்லது தாழ்த்தப்பட்ட மக்களில் இருந்து ஒருவரையோ வேட்பாளராக அறிவிக்கும் அளவுக்கு மனவளர்ச்சி எந்தக்கட்சிக்கும் இல்லை.அமெரிக்காவிலே நடந்துள்ள மாற்றமானது இந்தியாவிலும் எதிரொலிக்க வேண்டும்.அப்படிப்பட்ட ஒரு பொன்னாளுக்காக ஆவலுடன் காத்துக்கொண்டிருக்கிறேன்.

இந்திய தேசியம்

இப்போது இருக்கும் இந்தியா ராமரும்,பரதனும் சேர்ந்து உருவாக்கியதா?இல்லை. வெள்ளையர்கள் தங்கள் நிர்வாக வசதிக்காக எல்லை வகுத்து வைத்திருந்த மாபெரும் நிலப்பரப்பு தான் இன்றைய இந்தியா.இந்துமத நாடாக இருந்தாலும் நேபாளம் இன்று தனி நாடு , ஏனென்றால் அது வெள்ளையர்களால் கைப்பற்றப்படவில்லை .எனவே அது சுதந்திர நாடாக இருக்கிறது. 1934லேயே பர்மா தனி காலனி நிர்வாகத்தில் சென்றதால் அது தனி நாடாக இன்று இருக்கிறது, அதே போன்று தான் இலங்கையும். பர்மா,இலங்கை,மற்றும் இந்தியா மூன்றும் ஒரே நிர்வாகத்தின் கீழ் இருந்திருந்தால் இன்று இந்தியா அகண்ண்ண்ட தேசமாக இருந்திருக்கக்கூடும்.ஆக இன்றைய இந்தியா என்பது வெள்ளையன் மென்று துப்பிய சக்கை என்பது உள்ளங்கை நெல்லிக்கனி. பாரத்மாத்தாக்கிஜே போடுவது சுத்த பத்தாம்பசலித்தனம்.

நேபாளம் இந்துநாடு தானே என்று அதை இந்தியாவுடன் இணைத்துக்கொள்ள முடியுமா? முடியாது.இலங்கையில் இருக்கும் தமிழர்கள், இந்துக்கள் தானே மற்றும் ஸ்ரீலங்கா என்னும் பெயரே சமஸ்கிருதம் தானே , அதனால் அது இந்து தேசியத்தில் இருப்பது தானே முறை என்று சொல்லி இலங்கையை இணைத்துக்கொள்ள முடியுமா? நிச்சயம் முடியாது . இதிலிருந்து இந்தியாவை இணைத்து வைத்திருப்பது அரசியலமைப்புச்சட்டம் தானே,தவிர இந்துமத உணர்வோ,கலாச்சார ஒற்றுமையோ அல்ல என்பதைப் புரிந்து கொள்ளலாம்.

வெள்ளைக்காரன் போட்ட பெவிகால் 50,60 ஆண்டுகளுக்கு தாக்குப்பிடித்து உள்ளது.அந்த பெவிகால் ஒட்டு உதிர்ந்துவிடும் சூழலை நோக்கி தான் நாடு சென்று கொண்டிருக்கிறது.இந்த சூழ்நிலையில் இந்துதேசியம் பேசிக்கொண்டு பிஜேபி போன்ற கட்சிகள் வளர்ந்து கொண்டிருக்கின்றன. இந்த இந்துதேசியமானது இந்தியா சிதறுண்டு போவதிலிருந்து எத்தனை ஆண்டுகள் காப்பாற்றும் என்பது நம்முள் எழும் மிகப்பெரிய கேள்வி.

இந்தியாவில் வாழும் பலநூற்றுக்கணக்கான இனமக்களில் தமக்கான உரிமைகளையும்,மரியாதையையும் போராடிப்பெற்ற இனங்கள் பலவுண்டு(தமிழ்நாடு),போராடாமலே பெற்ற இனங்கள் சிலவுண்டு. என்னதான் போராடினாலும் அதையெல்லாம் நினைத்தே பார்க்கமுடியாத இனங்கள் நிறையவே உண்டு.அப்படிப்பட்டவர்களை தனியாகப்பிரிந்து செல்ல அனுமதிக்கவேண்டும்.அதனால் இந்தியா எந்தவிதத்திலும் குறைந்துவிடாது. வெறும் 12,000 மக்கள்தொகை கொண்ட டுவாலு என்ற நாட்டுக்கு பிரிட்டன் விடுதலை அளித்துள்ளது என்பதை எண்ணிப்பார்க்க வேண்டும். பேரினவாதம்,பெரும்பான்மை வாதம் போன்றவை நமக்கு நாமே குண்டு வைத்துக்கொள்ளும் திட்டம் தாம்.

தொடர்புடைய இடுகைகள்:
http://baluindo.blogspot.com/2008/10/blog-post_5013.html
http://www.maraneri.com/2008/10/blog-post_23.html

திருவாட்டி ஜெயலலிதாவுக்கு எச்சரிக்கை

இலங்கை தமிழர் பிரச்சினைக்காக போராடும் தமிழீழ விடுதலைப் புலிகளின் பிரச்சனையில் தலையிட வேண்டாமென செல்வி ஜெ.ஜெயலலிதாவுக்கு இறுதி எச்சரிக்கை. செல்வி, நீ உன் வேலையை ஒழுங்காகப் பார்த்துக் கொண்டு இருக்கவும். தமிழ் ஈழ விடுதலைப் புலிகளைப் பற்றி தமிழ்நாட்டில் பொய் பிரசாரம் செய்ய வேண்டாம். உன் நன்மைக்காக வேண்டி எச்சரிக்கிறோம்.

அம்மணி நீ தேவையில்லாமல் விடுதலைப் புலிகளின் விஷயத்தில் தலையிட்டால் அல்லது மூக்கு நுழைத்தால் அதன் விளைவு மிகப் பயங்கரமாக இருக்கும் என்பதை உனக்கு இறுதியாக உலகத் தமிழ் இன பாதுகாப்புக் கழகம் எச்சரிக்கிறது.

உனது நடவடிக்கையை மாற்றிக் கொள்வதற்கு ஒரு சந்தர்ப்பம் தருகிறோம். இனி வரும் காலத்தில் உன் செயல்பாட்டில் எந்த ஒரு மாற்றமில்லை என்றால் பெனாசிர் பூட்டோவுக்கு ஏற்பட்ட நிலைதான் உனக்கும் வரும்.

தமிழ் இனத்தோடும், தமிழர் உணர்வோடும் நீ மோதாதே! நெருப்போடு விளையாடதே!. எரிந்து சாம்பலாகிப் போவாய் என்பதை இதன் மூலம் எச்சரித்துக் கொள்கிறோம். இது வெறும் மிரட்டல் அல்ல.
எங்களின் ஆற்றல் மிக்க மன உறுதியின் வெளிப்பாடு, எங்கள் ஆதங்கம் உனக்கு புரிந்தால் சரி. புலிகளின் தாகம் தனி தாயகம். இதுதான் எம்மக்களின் வேட்கை. இதை தடைபோட எவர் நினைத்தாலும் அவர்களை அழிக்க நாங்கள் தயங்கமாட்டோம்.

தமிழ்நாட்டில் இருக்கும் ஏமாந்த அதிமுக கட்சிக்காரர்களுக்கு தலைவியாக நீ இருந்து கொண்டும், சில ஏமாளித் தமிழர்களுக்கும், அப்பாவி தமிழர்களுக்கும், உலக அரசியல் நடப்புத் தெரியாத தமிழ் உணர்வு இல்லாதவர்களுக்கும் நீ தலைவியாக இருந்து கொண்டும் அரசியல் நடத்தி பிழைத்துக்கொள். நீயொரு கன்னடப் பெண்மணி.

வெறும் பகட்டுக்கும், பணத்திற்கும், பதவிக்கும் வேண்டி உன்னிடம் ஒரு அடிமையைப் போல் இன உணர்வு அற்று சில தமிழர்கள் உனக்கு விசுவாசமாக இருக்கலாம். அதற்காக வேண்டி மொத்த தமிழ்நாடே உனக்கு அடிமையென்று எண்ணிவிடாதே. இறுமாப்புக் கொள்ளாதே! கர்வம் கொள்ளாதே.

எங்களைப் பொறுத்தவரை நீயொரு நடிகை. அரசியல் பொது வாழ்விலும், உன் நடிப்பும் உலகுக்கு தெரிகிறது. உலக அரசியல் வரலாற்றில் வீராவேசம் பேசியவர்கள் வாழ்ந்ததில்லை. மீண்டும் எச்சரிக்கிறோம், இலங்கையில் தன் இனம் காக்கவும், தன் சொந்த மண்ணின் உரிமைக்காக போராடும் தமிழ் ஈழ போராட்டவாதிகளின் உண்மை உணர்வை எழுச்சியை, உன் சொந்த விருப்பு வெறுப்புகளுக்கு பயன்படுத்தாதே!.

விடுதலைப் புலிகளின் தனி ஈழம் கொள்கையை உன்னைப் போன்று ஆயிரமாயிரம் முதல்மைச்சர்கள் வந்தாலும் தடுத்து நிறுத்த இயலாது. கட்டுப்படுத்த முடியாது.

விடுதலைப் புலிகளை நேசிக்கும் அல்லது ஆதரிக்கும் அல்லது தமிழ் ஈழம் அமைய வேண்டும் என்று எண்ணுபவர்கள் உலகில் வாழும் 75 நாடுகளில், 6 கோடிக்கு மேல் தமிழர்கள், அதாவது தமிழ்நாட்டையும் சேர்த்து இருக்கிறார்கள். அதற்காக வேண்டி நிதி உதவி செய்கிறார்கள் என்பது உனக்கு தெரியுமா? இதுவே உனக்கு இறுதி எச்சரிக்கை. உன்னை இறுதி யாத்திரைக்கு அனுப்ப எங்களுக்கு அதிக நேரமில்லை. அதிக காலம் தேவையில்லை. நீயொரு பெண் என்பதற்காக வேண்டி இவ்வளவு காலம் பொறுமையாகக் கடைப்பிடித்தோம்.

இதற்குமேல் நடப்பதை யார் அறிவார்? விடுதலைப் புலிகளை உலகில் யார் அழிக்க நினைத்தாலும் சரி அல்லது அவர்களுக்கு எதிராக செயல்பட்டாலும் சரி, அத்தகையவர்களை நாங்கள் அழிக்கத் தயங்க மாட்டோம் என்பது உண்மை.

எங்கள் போராட்டத்திற்கு முன்னால் நீயொரு தூசி. தமிழன் என்றொரு தனி இனம். அவன் குணமும் தனி என்பதை உணர்ந்து உன் தவற்றை இனிமேல் திருத்திக்கொள்.

நன்றி-thatstamil.com
மேலே உள்ள கடிதம் தமிழ்மைந்தன் என்பவரால் எழுதப்பட்டு மலேசியாவிலிருந்து அனுப்பப்பட்டுள்ளது.திருவாட்டி என்ற புதிய சொல் அறிமுகத்திற்காக நன்றியும், வன்முறை நிறைந்த கடிதத்திற்கு கண்டனமும் தெரிவித்துக்கொள்கிறேன்.

வல்லவனுக்கு வல்லவன் - II

காலங்காலமாக பல்வேறு ஊடகங்கள் மூலம் காட்டுக்கு ராஜா சிங்கம் என்ற செய்தி நமது மூளையில் பதிக்கப்பட்டுள்ளது. சிங்கம் கிட்டத்தட்ட எல்லா மிருகங்களையும் தனக்கு இரையாக்கிக் கொள்கிறது. அப்பேர்ப்பட்ட சிங்கத்தை அரண்டு ஓட வைத்த சின்னவன் ஒருவனைப்பற்றிய சிறு குறிப்பு தான் இது. அவன் பெயர் பெரும்புள்ளிப்பல்லியன்(Large grain lizard). எண்ணூறு கிலோ எடையுள்ள காட்டெருமை ஒன்றை நான்கு சிங்கங்கள் சேர்ந்து வீழ்த்திக்கொன்று விட்டன.அதன் வயிற்றைக்கிழித்து உருப்படியாக இரண்டு வாய் கூட சாப்பிட்டிருக்காது அந்த சிங்கங்கள், வந்துவிட்டான் பெரும்புள்ளிப்பல்லியன்.

இரண்டடி நீளத்தில் பத்துப்பதினைந்து கிலோ எடை கூட தேறாத அவனைப்பார்த்ததுமே சிங்கங்கள் கிலியாகிவிட்டன.நிமிர்ந்த நடையும்,நேர்கொண்ட பார்வையுமாக வருபவனை விரட்டும் முயற்சியில் இறங்கின சிங்கங்கள்.சுற்றிச்சுற்றி வரத்தான் முடிந்ததே தவிர அவனுடைய முன்னேற்றத்தை தடுக்க முடியவில்லை.நிதானமாக ஒவ்வொரு அடியாக முன்னேறிக்கொண்டிருக்கிறான் பல்லியன். மூன்று சிங்கங்கள் விரட்டும் முயற்சியைக்கைவிட்டு ஓரமாக அமர்ந்து வேடிக்கை பார்க்க ஆரம்பித்தன. ஒரு சிங்கம் மட்டும் தைரியத்தை இழக்காமல் களத்தில் இருந்தது.பயப்படும் அறிகுறி பல்லியிடம் இல்லை.ஒரு அடி முன்னால் வந்து உறுமிக்காட்டுவதும் இரண்டு அடி பின்னால் ஓடுவதுமாக சிங்கத்தின் நிலை பரிதாபமாக ஆகிக்கொண்டிருந்தது.பின்னணியில் போடா போடா புண்ணாக்கு பாட்டு ஒன்று பாடாதது தான் குறை. இறுதியில் பல்லி வென்றே விட்டது,மிச்சமிருந்த சிங்கமும் வாலைச்சுருட்டிக்கொண்டு பங்காளிகளுடன் போய் சேர்ந்து கொண்டது.நான்கு சிங்கங்களின் பாதுகாப்பு அரணோடு பல்லியன், எருமையின் மீதேறி வயிற்றுக்குள் தலையைவிட்டு சாப்பிட ஆரம்பித்ததைப் பார்க்கும் யாவரும் வாயைப்பிளக்காமல் இருக்கமுடியாது.

கொடிய விசமுள்ள நாகப்பாம்பும் கூட பல்லியின் முன் மண்டியிடுகிறது.நாகத்தை நார்நாராகக்கிழித்துத் தொங்கவிடும் காட்சி நம்மை பிரமிக்க வைக்கிறது.காட்டுராஜா சிங்கம் என்பதை மீள்பரிசீலனை செய்யும் காலம் வந்துவிட்டது.
நன்றி-டிஸ்கவரி சேனல்
வல்லவனுக்கு வல்லவன் - I

கோவியாருக்கு எச்சரிக்கை

பொறுத்துப்பொறுத்துப்பார்த்து வேறு வழியில்லாமல் தான் இதை எழுத வேண்டியதாகி விட்டது. தெரிந்து செய்கிறாரா,தெரியாமல் செய்கிறாரா என்று தெரியவில்லை. இனிமேலும் இதை சுட்டிக்காட்டாமல் இருந்தால் தமிழன்னை என்னை மன்னிக்க மாட்டாள். சுவாரஸ்யம் என்ற சொல்லுக்கு ஈடான தமிழ்ச்சொல் என்ன என்று கேட்டு இராம.கி அய்யா "சுவையாரம்" என்ற சொல்லை வழங்கினார். கேள்வி கேட்டவரே கோவியார் தான். இப்போது அவரே சுவையார்வம் என்ற சொல்லை பயன்படுத்திக்கொண்டிருக்கிறார். சுவையாரமா, ஆர்வமா எது சரி? கோவியாரின் விளக்கத்தை எதிர்பார்க்கிறோம்.

கொஞ்சம் அரசியல்

எம்ஜியார் சாதிகளுக்கு அப்பாற்பட்டவர் என்பது போன்ற பிம்பத்தை ஏற்படுத்தும் தகவல் ஒன்றை படிக்க நேர்ந்தது. திமுகவை விட்டு விலகிய பின் எம்ஜியார் சந்தித்த முதல் தேர்தல் திண்டுக்கல் பாராளுமன்ற இடைத்தேர்தல். அதில் போட்டியிட்ட மாயத்தேவரை விளிக்கும் போதெல்லாம் மாயன் என்றே விளித்தாராம்.அதனால் அவர் சாதியைக்கடந்தவராம். ஆனால் மாயன் என்ற பெயரில் மதுரையில் வழக்கறிஞராக பணியாற்றிக்கொண்டிருந்தவருக்கு மாயத்தேவர் என்ற பெயர் சூட்டி தேர்தலில் நிற்க அனுமதித்தவரே எம்ஜியார் தான்.சாதிப்பெயரை பின்னால் போட்டுக்கொள்ளும் வழக்கத்தை ஒழிக்க பாடுபட்ட திராவிட இயக்கங்களின் தலையில் மண் அள்ளிப்போடும் விதமாக சாதிப்பெயருடன் ஒருவரை தேர்தலில் நிற்க அனுமதித்தது தவறில்லையாம், சாதிப்பெயரை தவிர்த்துவிட்டு மேடையில் பேசியது உயர்வான செயலாம். என்னாங்கடா உங்க வார்த்தை ஜாலம்.

35 ஆண்டுகளுக்கு முன்பே சாதி அரசியலுக்கு வழிவகுத்தவர் எம்ஜியார்.இத்தனை வருடங்களில் சாதியில்லாமல் அரசியல் செய்ய முடியாது என்ற நிலையிலும் கலைஞர் சென்ற சட்டமன்ற தெர்தலின் போது மூவேந்தர் முன்னேற்றக்கழகத்தின் சார்பில் ஒச்சாத்தேவர் என்ற வேட்பாளர் நிறுத்தப்பட்ட போது சாதி்ப் பெயருடன் கூடிய வேட்பாளரை ஆதரிக்க மாட்டோம் என்று சொல்ல மூ.மு.க கூட்டணியை விட்டு விலகியதும் வரலாறு.

அடுத்து சினிமா

சமீபத்தில் திரையரங்கில் பார்த்து ரசித்த படங்கள் அஞ்சாதே,மற்றும் வேட்டையாடு விளையாடு. இதே கதையுள்ள இரண்டு ஆங்கிலப்படங்களை பார்த்தேன் . DEVIL'S OWN, மற்றும் BONE COLLECTOR. அஞ்சாதே, டெவில்ஸ் ஓன் படத்தின் இன்ஸ்பிரேஷன் என்று சொல்லலாம். வேட்டையாடு விளையாடு போன் கலெக்டரின் அப்பட்டமான காப்பி.

இலக்கிய மனமும், இளகிய மனமும்

புதுமைப்பித்தனின் நினைவில் நிற்கும் சிறுகதை ஒன்று. கணவனை இழந்துவிட்ட அல்லது கணவனால் கைவிடப்பட்ட பெண்ணொருத்தி மிகுந்த துயரத்தோடு நாட்களைக்கடத்திக்கொண்டிருக்கிறாள். அதைக்கண்டு மனம் வாடிய இளைஞன் ஒருவன் தன் காதலை அவளிடத்தில் சொல்கிறான். பரிதாபத்தில் பிறந்த உன் காதல் வேண்டாம் என மறுத்துவிடுகிறாள். இதுவரை கதை இயல்பாக இருக்கிறது. அதன்பின் அந்தப்பெண் அவனிடம் "உன் தியாகத்துக்கு என்னைப் பலியாடு ஆக்கிவிடாதே" என்று கூறுகிறாள். இப்படியும் ஒருபெண் சிந்திப்பாளா என்று எண்ணலானேன். இப்படி ஆழமாக சிந்திப்பதால் தான் புதுமைப்பித்தன் தமிழின் சி்றந்த இலக்கியவாதியாகப் போற்றப்படுகிறார்.

ஆனால் இவ்வாறில்லாமல்
"கண்ணுக்குள் பாவை போல் உருண்டிடும் உள்ளம்
கைம்பெண்ணுக்கும் உண்டென்று உணர்ந்திடுவாய்"
என்று எழுதினால் அது பிரச்சாரத்தன்மையுடையதாகி விடுகிறது , அதனால் இது இலக்கியம் இல்லை என்றாகி விடுகிறது. அதனால் இதை எழுதிய கலைஞர் இலக்கியவாதி இல்லை, என்ன கொடுமை?:-(.

இலக்கியச்சுவையும்,படித்து சிலாகிப்பதும் மட்டும் தானா படைப்பின் நோக்கமாக இருக்க வேண்டும்.சமூகத்திற்கு எந்த வகையிலாவது உதவ வேண்டாமா?.அந்த வகையில் புதுமைப்பித்தனை விட கலைஞரே மேலானவராக எனக்குத்தோன்றுகிறார். எனது எண்ணத்தை உறுதிப்படுத்துவது போலவே ஈழத்தைச்சேர்ந்த இலக்கியவாதி தளையசிங்கம் கலைஞரைப் பற்றி மிக அருமையாக குறிப்பிட்டுள்ளார்.
"அகிலனை விடத் திறமையான கலைஞன். புதுமைப்பித்தனையும் மெளனியையும்விட கலையின் நோக்கத்தைப் பரிபூர்ணமாக புரிந்து கொண்டவன். பாரதியைப் போலவே போர்க்கோலம் பூண்டவன். அவனே மு.கருணாநிதி"
(நன்றி-ராஜநாயஹம்)

மனித மனத்தினை ஆழ்ந்து ஆராய்ந்து பீராய்ந்து எழுதுவதை விட மனித மனத்திலே மாற்றத்தை ஏற்படுத்தும் எழுத்துக்களே பிடித்திருக்கிறது.

திராவிட மரம்

http://www.dravidianuniversity.ac.in/tree.html

அதிகாரின்னா இப்படி இருக்கணும்

சின்னமனூர்: "எச்.ஐ.வி., (எய்ட்ஸ்) இல்லா தம்பதிகளுக்கு மட்டுமே திருமணம்' செய்து வைக்கப்படும் என்ற புதிய திட்டத்தை அறிமுகப்படுத்தி, சின்னமனூர் மறவர் மக்கள் மன்ற திருமண மண்டப நிர்வாகிகள் அப்பாவி பெண்ணின் வாழ்க்கையை காப்பாற்றி உள்ளனர். தேனி மாவட்டம், சின்னமனூர் மறவர் மக்கள் மன்றத்தில் திருமணம் செய்யும் புதுமண தம்பதிகள் எச்.ஐ.வி., பரிசோதனை செய்ய வேண் டும் என்ற விதிமுறை உள்ளது.கடந்த வாரம் மணமகனுக்கு எச்.ஐ.வி., உள்ளது பரிசோதனையில் உறுதியானதால் தேனி அல்லிநகரத்தை சேர்ந்த மணமகளுக்கும், சின்னமனூரை சேர்ந்த மணமகனுக்கும் இங்கு நடக்க இருந்த திருமணம் நிறுத்தப்பட்டது. இதனால் அந்த அப்பாவி பெண்ணின் வாழ்க்கை காப்பாற்றப்பட்டது.

இந்த திருமண மண்டபத்தை 52 பேர் கொண்ட நிர்வாக குழு நிர்வகித்து வருகிறது. இக்குழுவினர் தலைவர் திருவாணன் 37 ஆண்டுகள் சுகாதாரத்துறையில் வட்டார சுகாதார ஆய்வாளராக பணியாற்றி ஓய்வு பெற்றவர். மண்டப நிர்வாகியாக பொறுப்பேற்றதும் திருவாணன் "மறவர் சமூகத்தில் எச்.ஐ.வி., இல்லாத தம்பதிகளுக்கு மட்டுமே திருமணம்' என்று இவர் கொண்டு வந்த திட்டத்திற்கு 52 நிர்வாக குழு உறுப்பினர்களும் ஆதரவு தெரிவித்தனர்.

இத்திட்டத்தை மறவர் சமுதாய மக்களும் ஏற்று திருமணத்திற்கு முன்னர் எச்.ஐ.வி., பரிசோதனை செய்தனர். இங்கு திருமணம் முடிக்கும் மற்ற சமுதாய மக்களும் இவர்களின் கொள்கைகளுக்கு மதிப்பளித்து எச்.ஐ.வி., பரிசோதனை செய்து வருகின்றனர். இரண்டு ஆண்டுகாலமாக இங்கு திருமணம் செய்யும் தம்பதிகளுக்கு எச்.ஐ.வி., பரிசோதனை நடத்தப்பட்டாலும், கடந்த வாரம் தான் மணமகனுக்கு பரிசோதனையில் எச்.ஐ.வி., கண்டறியப்பட்டு ஒரு திருமணம் நிறுத்தப்பட்டுள்ளது.

சென்னையில் நடந்த சுகாதாரத்துறை கருத்தரங்களில் சின்னமனூர் ஊராட்சி ஒன்றிய டாக்டர் இந்த திருமண மண்டபத்தில் அமல்படுத்தப்படும் விதிமுறை குறித்து தெரிவித்த போது, அந்த அரங்கில் இருந்த அத்தனை பேரும் கைதட்டி வரவேற்று உள்ளனர். இந்த குழுவினரின் நடவடிக்கையை முன் உதாரணமாக ஏற்று அரசு திருமணத்திற்கு முன்னர் எச்.ஐ.வி., பரிசோதனையை கட்டாயமாக்க வேண்டும் என வலியுறுத்தி உள்ளனர்.

அனைவரின் வரவேற்பையும் பெற்ற திட்டத்தை அறிமுகப்படுத்தி உள்ள இத்திருமண மண்டப தலைவர் திருவாணன், பொருளாளர் சிவானந்தன், துணை தலைவர் சந்திரன் கூறியதாவது: அனைத்து தரப்பிலும் வரவேற்பு கிடைத்துள்ளதால் திருமணத்திற்கு முன்னர் எச்.ஐ.வி., பரிசோதனை என்ற திட்டத்தை நிச்சயத்திற்கு முன்னர் வைக்க திட்டமிட்டுள்ளோம். நிச்சயம் வைத்து 3 மாதங்கள் கழித்து திருமணம் முடித்தால் மீண்டும் ஒரு முறை எச்.ஐ.வி., சோதனை செய்ய அறிவுறுத்தி உள்ளோம். அடுத்து எங்கள் சமுதாய இளைஞர்களுக்கு இலவச எச்.ஐ.வி., விழிப்புணர்வு பரிசோதனை முகாம் கருத்தரங்கு நடத்த உள்ளோம். மற்ற சமுதாயத்தினரிடம் எங்கள் கருத்துக்களை திணிக்க முடியாது. ஆனால் பின்பற்றுபவர்களுக்கு தேவையான அத்தனை உதவிகளும் செய்வோம். அரசு இதனை சட்டமாகவே கொண்டு வரலாம். இவ்வாறு தெரிவித்தனர்.

நன்றி:தினமலர்

ஜோதிடத்தின் மகிமை

ஜோதிடத்தில் நம்பிக்கையுள்ளவர்கள் இந்த செய்தியை படியுங்கள்.
http://www.dinamalar.com/Sambavamnewsdetail.asp?news_id=4118&ncat=DI&archive=1&showfrom=8/18/2008
தன் மகனை தானே கொன்றுவிட்டு வாழ்க்கை முழுக்க நரகவேதனையை சுமந்துதிரியும் எண்ணற்ற அப்பாவிகள் உருவாகிக்கொண்டே இருக்கிறார்கள்.மகனையே கொலை செய்யும் அளவுக்கு மனதில் நஞ்சை விதைத்த ஜோசியக்காரருக்கும் இந்தக்கொலையில் பங்குண்டு, ஆனால் இப்படிப்பட்டவர்கள் மீது காவல்துறையினர் நடவடிக்கை ஏதும் எடுத்தது போல் தெரியவில்லை.

சீனாவில் ஒலிம்பிக் தொடங்கும் முன் பிச்சைக்காரர்களுடன் சேர்த்து ஜோசியக்காரர்களையும் அப்புறப்படுத்தியிருக்கிறார்கள். சீனா தங்கமாக குவித்துக்கொண்டிருக்கிறது. இதை நாமும் பின்பற்றினால் அடுத்த ஒலிம்பிக்கில் தங்கம் வாங்கலாம்.